Historio di Botswana

bushmani (populo San) en Botswana.

Bantua expanso tra Afrika.

La historio di Botswana komencis plu kam 100.000 yari ante nun, kande l'unesma homi arivis en la regiono. L'unesma habitanti esis bushmani (populo San) e la populo Khoi. Ambe parolis lingui Khoisan e transvivis de chaso e de la kolio di alimenti. Kelkatempe inter la yari 200 e 500 pos Kristo bantua populi qui vivis en Katanga (nune parto di Demokratial Republiko Kongo e Zambia) movis vers la teritorio di nuna Botswana. Pose en lua ekmigrado li atingis la nuna Sudafrika.

Cirkume la yaro 1300 de la Kristana ero, populi qui vivis en la nuna Transvaal komencis kunfuzar su en tri linguala e politikala grupi, inkluzite le Batswana (pluralo di Motswana) qui esas la precipua rasala grupo de la lando til nun.

Dum la 19ma yarcento komencis milito inter la populo Tswana e la populo Ndebele , qua inkursis en nord-esto di la teritorio. Pos apeli dal rejulo Khama la 3ma di Batswana, Unionita Rejio pozis la regiono sub lua protektorato. Unesma nomo di teritorio sub Britaniana dominaco esas Bechuanalando. Lando nomizita segun la Tswana-grupo de Bantua-tribui.

Flago di Botswana.

Kande la Uniono di Sudafrika formacesis en 1910, Bechuanalando, Basutolando (nune Lesotho) e Swazilando (nune Eswatini) ne inkluzesis en lua teritorio. Kande la Nacionala Partiso ganis povo en Sudafrika en 1948 e adoptis segregaco, l'ideo pri unionar la teritorii desaparis.

En junio 1964 Unionita Rejio aceptis l'ideo pri propra demokratiala guvernerio por Botswana, qua divenis nedependanta ye la 30ma di septembro 1966. Seretse Khama esis lua unesma prezidanto, e rielektesis du foyi. En 1984 eventis elekto e la viceprezidanto Quett Joni Masire vinkis. Ilu anke rielektesis du foyi, en 1989 ed en 1994.