Eswatini

De Wikipedio
(Ridirektita de Swazilando)
Salti al navigilo Irez a serchilo
Eswatini
Umbuso weSwatini
Kingdom of Eswatini
Flag of Eswatini.svg Coat of arms of Eswatini.svg
Standardo di Eswatini Blazono di Eswatini
Nacionala himno:
Nkulunkulu Mnikati wetibusiso temaSwati
Location Eswatini AU Africa.svg
Urbi:
Chefurbo: Mbabane
· Habitanti: 80.000 (2001)
· Rejala e legifala chefurbo: Lobamba
Precipua urbo: Mbabane
Lingui:
Oficala lingui: Angla, linguo SiSwati
Guvernerio:
Tipo: Monarkio
· Rejo: Mswati la 3ma
· Chefministro: Ambrose Dlamini
Surfaco: (157ma granda)
· Totala: 17.364 km²
· Aquo: 0,9 %
Habitanti: (154ma granda)
· Totala: 1 343 098 (2016)
· Denseso di habitantaro: 68,2 hab./km²
Plusa informi:
Valuto: Lilangeni
Veho-latero: sinistre
ISO: SZ
SWZ
748
Reto-domeno: .sz*
Precipua religio: kristanismo, 86,9%
Oficala retosituo: http://www.gov.sz/


Eswatini, oficale la Rejio di Eswatini, esas mikra lando en sudal Afrika, cirkondata dal teritorii di Mozambik este, e Sudafrika, norde, weste e sude. La nomo di la lando originis de la 19ma-yarcenta rejulo Mswati la 2ma, qua expansis ed unionigis la nuna rejio.

La lando nomesis pro la populo Bantuo Swazi, e por la rejulo Mswati la 2ma. Swazi esis olima chefo, e lua nomo signifikas 'la vergo'.

Bazala fakti pri Eswatini.

Historio[redaktar | redaktar fonto]

 Precipua artiklo: Historio di Eswatini
Mapo di sudal Afrika en 1896.

La nuna Eswatini habitesis de la prehistorio. Arkeologiala restaji montras ke homala grupi ja habitis ibe 200 mil yari ante nun. En multa loki de la lando trovesas pikturi de 27 mil yari ante nun. L'unesma habitanti esis chaseri-kolekteri de etnio Khoisan.

Pos diversa konflikti kun populi qui vivis en la regiono di nuna Maputo, Mozambik, le Ngwane (altra nomo por la populo Swazi) establisis su en la regiono konocita kom Zululando en 1750. Pro le Ngwane esir min povoza kam la populo zuluo, li translojis su adnorde dum la yari 1810ma e 1820ma. Sub la regno di Sobhuza la 1ma la populo Swazi establisis su en la regiono di nuna Eswatini.

Kontakti kun Britaniani komencis dum la 19ma yarcento. En 1881 Britaniani subskribis pakto qua agnoskis la nedependo di Eswatini. Tamen, dum la rejio di Mswati la 2ma, l'unesma blanki - Buri, de Transvaal - establisis su en la teritorio di la lando. En 1902 Britaniani eniris la teritorio di la rejio e proklamis lua dominaco e resortiso super Eswatini, komence kom parto di Transvaal. En 1906 Britaniani separis Eswatini de la kolonio Transvaal.

De 1906 til 1968, Eswatini administresis da rezidanta guberniestro, qua guvernis segun dekreti dal alta komisito por Sudafrika. La lando nedependeskis del Unionita Rejio ye la 6ma di septembro 1968.

Politiko[redaktar | redaktar fonto]

Eswatini esas absoluta diarkio*, en qua ambe la rejulo (Ngwenyama) e la matro-rejino (Ndlovukati) guvernas kun diferanta povi. La matro-rejino (Ndlovukati) esas la spiritala chefo di la lando, kontre ke la rejulo (Ngwenyama) esas chefo di stato e chefo di guvernerio e la "komplemento" di la Ndlovukati.[1] Mswati la 3ma. La chefa ministro, nune Ambrose Dlamini, nur esas la chefo dil ministraro.

La parlamento havas 2 chambri: Senato, kun 30 membri, e Domo di Asemblitaro (House of Assembly), kun 65 membri.

Judiciala povo esas duala. En 2006 la konstituco establisis judiciala modelo segun Ocidentala influo. Ol konsistas ek 4 judiciistala korti, un supra korto ed un apelo-korto, qui esas nedependanta de rejala kontrolo. La judiciisti indikesas dal rejulo, ed ordinare esas ekmigranti de Sudafrika.

Kande la lando divenis nedependanta ye la 6ma di septembro 1968, ol adoptis konstituco kun influo Britaniana. Ye la 12ma di aprilo 1973, lora rejulo Sobhuza la 2ma nuligis ol tra dekreto, ed asumis omna povi exekutiva, legifala e judiciala. En 2005, la lando adoptis lua nuna konstituco.

Geografio[redaktar | redaktar fonto]

Topografio di Eswatini.
Peizajo di Eswatini.

Quankam lua mikra surfaco - nur 17 364 km² - Eswatini havas quar geografiala regioni. L'altitudo influas en la klimato e la peizajo.

Alonge la frontiero kun Mozambik jacas Lubombo, kateno di monti kun mezvalora altitudo di 600 metri. La valo di tri fluvii brechizas ta kateno: Ngwavuma, Usutu e Mbuluzi. En ta regiono di vali konocita kom Lowveld la precipua ekonomiala agado esas l'edukado di bovaro. An la westala frontiero kun Sudafrika jacas montoza regiono konocita kom Highveld, kun mezvalora altitudo di 1 200 metri. En ta regiono jacas la chef-urbo di lando, Mbabane. Inter ta regiono e la valo jacas Middleveld, regiono kun mezvalora altitudo di 700 metri.

Pluvas plu freque dum la monati di somero, ofte forte. La sika sezono eventas dum la vintro. La mezvalora pluvozeso esas plu alta an la regiono Highveld (1000 til 2000 mm omnayare). Este, an la vala regiono Lowveld, la mezvalora pluvozeso yarala varias de 500 mm til 900 mm. La vejetantaro varias de pluvala foresto an la nordo til savano este e nordeste de la lando.

Ekonomio[redaktar | redaktar fonto]

 Precipua artiklo: Ekonomio di Eswatini

Demografio[redaktar | redaktar fonto]

Habitantaro de 1961 til 2013 (mili).
Populo Swazi dansas en vilajo.

Segun statistiki de The World Factbook por julio 2018, Eswatini havis 1 087 200 habitanti.[2] Cirkume 97% esas Afrikani. Europani esas 3%.[2]

L'oficala linguo di la lando esas Angla e SiSwati.[2]

La religio kun maxima nombro di adepti esas kristanismo, praktikata da 90% de la habitantaro. Mohamedani esas 2%, altri (inkluzite Baha'i, Budismo, Hinduismo, edc) esas 8%.[2]

La demografio di Eswatini afektesas da epidemio di AIDS, qua produktas granda mortado. Cirkume 27,4% de la adulti portas la viruso.[2] La viv-expekto por la habitantaro esis 57,2 yari en 2018.[2]

Kulturo[redaktar | redaktar fonto]

Princino Sikhanyiso Dlamini.

Tradicionala kulturo di Eswatini permisas poligamio por la viri. La chefulo di familio komandas tra exempli e konsideresas la provizanto por omna familio.

La precipua tradicionala ceremonio esas "Incwala", qua eventas la 4ma dio pos la plena luno maxim proxima de la 21ma di decembro. La maxim bona tradukuro por "Incwala" esas "la ceremonio dil rejeso". Ol nur eventas kande lando havas rejulo - sen rejulo ne eventas "Incwala". La rituali kontrolesas da sacerdoti nomizita Bemanti ("populo de la aquo") o Belwandle ("populo de la maro") nam li adportas aquo de la maro o de la fluvii por plufortigar la rejulo.

Referi[redaktar | redaktar fonto]

  1. Kuper, Hilda (1980 [1947]). An African Aristocracy. Rank Among the Swazi [facsimile reprint]. Africana Publishing Company for the International African Institute.
  2. 2,0 2,1 2,2 2,3 2,4 2,5 Africa::Eswatini - The World Factbook. CIA. URL vidita ye la 1ma di aprilo 2019.
Commons
Commons havas kontenajo relatante a:



Nedependanta stati en Afrika
Aljeria | Angola | Benin | Botswana | Burkina Faso | Burundi | Centrafrika | Chad | Demokratial Republiko Kongo | Djibuti | Egiptia | Equatorala Guinea | Eritrea | Etiopia | Gabon | Gambia | Ghana | Guinea | Guinea Bisau | Ivora Rivo | Kabo Verda | Kamerun | Kenia | Komori | Kongo | Lesotho | Liberia | Libia | Madagaskar | Malawi | Mali | Maroko | Maurico | Mauritania | Mozambik | Namibia | Nigeria | Nijer | Ruanda | Sao Tome e Principe | Senegal | Sierra Leone | Seycheli | Somalia | Sudafrika | Sudan | Sud-Sudan | Swazilando | Tanzania | Tunizia | Togo | Uganda | Zambia | Zimbabwe
Dependanta teritorii
Ceuta | Kanarii | Madeira | Melilla | Westala Sahara | Mayotte | Reunion | Sokotra
Nedependi ne agnoskata
Somalilando | Puntlando