Gabon

De Wikipedio
Salti al navigilo Irez a serchilo
Gabon
République Gabonaise
Flag of Gabon.svg Coat of arms of Gabon.svg
Standardo di Gabon Blazono di Gabon
Nacionala himno:
La Concorde
LocationGabon.svg
Urbi:
Chefurbo: Libreville
· Habitanti: 703 904 (2013)
Precipua urbo: Libreville
Lingui:
Oficala lingui: Franca
Guvernerio:
Tipo: Republiko
· Prezidanto: Ali Bongo Ondimba
· Chefa ministro: Rose Christiane Ossouka Raponda
Surfaco: (76ma granda)
· Totala: 267 745 km²
· Aquo: 3,76 %
Habitanti: (145ma granda)
· Totala: 2 119 036[1] (2018)
· Denseso di habitantaro: 5,5 hab./km²
Plusa informi:
Valuto: Franko CFA di Central Afrika
Veho-latero: dextre
ISO: GA
GAB
266
Reto-domeno: .ga*
Precipua religio: kristanismo


Gabon esas lando jacanta en central Afrika. Ol havas kom vicini Equatorala Guinea nord-weste, Kamerun norde, e Republiko Kongo este e sude. Weste, jacas Atlantiko.

Bazala fakti pri Gabon.

Historio[redaktar | redaktar fonto]

 Precipua artiklo: Historio di Gabon

L'unesma habitanti di nuna Gabon esis pigmei, e pose populi bantua. Portugalani esis l'unesma Europani qui arivis ibe, dum la 15ma yarcento. Lor, la litoro di la regiono kontrolesis dal rejio Loango. La nomo "Gabon" originis de Portugalana vorto gabão, signifikante "mantelo", qua esas aproxime la formo dil estuario dil fluvio Komo proxim Libreville.

Mapo de 1670 pri westal Afrika.

Francia asumis la stando di protektero di la regiono kande signatis pakti kun lokala chefi en 1839 ed en 1841. Franca explorero Pierre Savorgnan de Brazza arivis en la regiono en 1875 e fondis Franceville. En 1885 Francia oficale okupis la teritorio, ma ne administris ol til 1903.

En 1910 Gabon unionesis ad altra tri teritorii por formacar Franca Equatoral Afrika. En 1922 lunesma politikala partiso di Gabon, Jeunesse Gabonais, fondesis. Dum la duesma mondomilito, Federiti okupis Gabon, por revokar lora administrado favorebla al rejimo di Vichy.

Gabon divenis nedependanta de Francia en 1960. Pos la nedependo existis du partisi: Bloc Democratique Gabonais - BDG - komandita dal prezidanto Léon M'ba, ed Union Democratique et Sociale Gabonaise - UDSG - komandita da Jean-Hilaire Aubame, qua divenis Ministro por exteral aferi di la lando. Léon M'ba elektesis prezidanto ed asumis la povo en 1961, kun Omar Bongo Ondimba kom vice-prezidanto.

Pos ke M'ba asumis la povo ilu interdiktis jurnalaro e proskriptis politikala protesti. Kande ilu dissolvis la parlamento en 1964 por institucar guvernerio kun singla partiso, militisti probis ekpulsar lu per stato-stroko, ma pos 24 hori Franca trupi di parafalisti sendesis a Gabon por restitucar la povo a M'ba. Malgre internaciona kondamno, Franci restis proxim la chef-urbo por suportar M'ba. Kande M'ba mortis en 1967 Omar Bongo asumis la povo, e guvernis til lua morto ye la 8ma di junio 2009. Lua filiulo, Ali Bongo Ondimba, asumis povo ye la 16ma di oktobro sam yaro.[2] Ilu rielektesis en 2016, en elekti koruptita per multa neregulozaji, violaco di homala yuri, aresti e violento pos-elekto.

Politiko[redaktar | redaktar fonto]

Prezidanto Ali Bongo Ondimba.
Senato di Gabon.

Gabon esas republiko ube la prezidanto esas chefo di stato e, fakte, anke la chefo di guvernerio. La prezidanto, nun Ali Bongo Ondimba, elektesas dal populo por 7-yara periodo. La prezidanto povas nominar e revokar la chefa ministro, qua nur esas la chefo dil ministraro.

La parlamento havas 2 chambri: Senato (Sénat), kun 91 membri, e Nacional Asemblitaro (Assemblée Nationale), kun 120 membri. La senatani elektesas dal populo por 6-yara periodo, kontre ke la deputati di Nacional Asemblitaro elektesas dal populo por 5-yara periodo. La konstituco di Gabon adoptesis en 1961, modifikesis en 1975, riskribesis en 1991 e revizesis en 2003.

La Supra Korto esas la maxim alta de judiciala povo e subdividesas en tri chambri - judiciala, administrala e chambro di konti. Ank existas konstitucala korto, apelo-korti, Korto pri la sekureso dil stato, e lokala korti.

Geografio[redaktar | redaktar fonto]

Topografiala mapo di Gabon.
La fluvio Ogoué.

Havanta 267 745 km², la tota surfaco di Gabon esas poke min granda kam olta di Kolorado. Equatoro trairas lua teritorio. L'Equatorala foresto kovras 89,3% de lua surfaco. En 2002, Omar Bongo Ondimba selektis cirkume 10% de la teritorio di la lando por prezervar en nacionala parki. Nun existas 62 protektata arei en la lando.

La lando povas dividesar en tri regioni. La rivala planajo komencas en la litoro ed iras de 30 km til 200 km doplande, e kontenas parceli di la manglieri de central Afrika. En la regioni montoza (Crystal Mountains nord-este de Libreville, la monti Chaillu centre de la lando, e la monti Ikondou) naskas multa fluvii e riveri, e ca zono kovresas da boski. Existas regiono kovrata da savano este de la lando.

La dominacanta klimato esas Equatorala, kun intensa pluvi. La pluvo-quanto en Libreville superiras 2540 mm omnayare. Norde, an la litoro, la pluvo-quanto atingas 3810 mm omnayare.

La maxim longa fluvio di la lando esas Ogooué, longa de 1.200 km. Lua maxim alta monto esas Monto Iboundji, kun 1.575 metri di altitudo.

Ekonomio[redaktar | redaktar fonto]

 Precipua artiklo: Ekonomio di Gabon

Petrolo esas la maxim importanta produkturo por l'ekonomio di Gabon. La lando esas un ek la maxim prosperoza de sub-Saharana Afrika.

Demografio[redaktar | redaktar fonto]

Mulieri del etnio Mpongwe.
Katolika katedralo en Mouila.

Segun statistiki de The World Factbook por 2018, Gabon havis 2 119 036 habitanti. La maxim multa (80,1%) naskis en Gabon (di qui 23.2% esis Fang, 18.9% esis Shira-Punu/Vili, 11.3% esis Nzabi-Duma, 6.9% esis Mbede-Teke, 5% esis Myene, 4,9% esis Kota-Kele, 2,1% esis Okande-Tsogo, 3% esis pigmei e 7% apartenis ad altra etnii, segun statistiki de 2012). Kamerunani esas 4,6%, 2,4% naskis en Mali, 2,1% esas Beninani, 1,6% aquiris Gabonana civitaneso, 1,6% esas Togoani, 1,1% esas Senegalani, e 5% havas altra nacionesi.[1]

L'oficala linguo di la lando esas la Franca. La lingui Fang, Myene, Nzebi, Bapounou/Eschira e Bandjabi anke parolesas.[1]

La religio kun maxim granda nombro di adepti esas katolikismo: 42,3% de la habitantaro. Protestanti esis 12,3%, altra kristani 27,4%, Mohamedani esis 9,8%, animisti 0,6%, altra religii esis 0,5%, e 7,1% ne deklaris religio, segun statistiki de 2012.[1]

La maxim populoza urbo esas la chefurbo, Libreville. Altra importanta urbi esas Port Gentil e Franceville.

Kulturo[redaktar | redaktar fonto]

tradicionala maskili de Gabon

La folkloro e mitologio di Gabon esas richa, e lua rakonti transmisesas orale de generaciono a generaciono, nome inter la populi Fang e Nzebe. Nun, tale-nomizita raconteurs esforcas pri durar ca tradiciono. La tradicionala maskili del etnii Fang e Kota, qui uzesas en multa okazioni, exemple funeri, ank esas importanta parto di lua folkloro.

Pri literaturo, exemple pri importanta skriptisti esas Jean-Baptiste Abessolo, Chantal Magalie Mbazo'o-Kassa e Vincent de Paul Nyonda.

La muziko di Gabon esas poke konocata kompare olta di Demokratial Republiko Kongo e Kamerun. Patience Dabany esas la maxim konocata kantistino e muzikistino di la lando.

La guvernerio esas proprietanto di brodkasto-kompanio Radio-Diffusion Télévision Gabonaise, qua brodkastas en la Franca ed en regionala lingui.

La sporto maxim populara en la lando esas futbalo. La nacionala esquado pri futbalo reprezentas la lando en internaciona konkursi depos 1962. Basketbalo esas altra populara sporto. En London, 2012, Gabon ganis lua unesma Olimpiala medalio: l'arjenta, pri taekwondo.

Referi[redaktar | redaktar fonto]

  1. 1,0 1,1 1,2 1,3 Africa::Gabon - The World Factbook (Angla). CIA. URL vidita ye la 20ma di novembro 2018.
  2. Background note:Gabon US Dept. of State
Commons
Commons havas kontenajo relatante a:



Nedependanta stati en Afrika
Aljeria | Angola | Benin | Botswana | Burkina Faso | Burundi | Centrafrika | Chad | Demokratial Republiko Kongo | Djibuti | Egiptia | Equatorala Guinea | Eritrea | Etiopia | Gabon | Gambia | Ghana | Guinea | Guinea Bisau | Ivora Rivo | Kabo Verda | Kamerun | Kenia | Komori | Kongo | Lesotho | Liberia | Libia | Madagaskar | Malawi | Mali | Maroko | Maurico | Mauritania | Mozambik | Namibia | Nigeria | Nijer | Ruanda | Sao Tome e Principe | Senegal | Sierra Leone | Seycheli | Somalia | Sudafrika | Sudan | Sud-Sudan | Swazilando | Tanzania | Tunizia | Togo | Uganda | Zambia | Zimbabwe
Nesuverena teritorii
Ceuta | Kanarii | Madeira | Melilla | Westala Sahara | Mayotte | Reunion | Sokotra
Nedependo ne agnoskata
Somalilando | Puntlando