Maurico

De Wikipedio
Salti al navigilo Salti al serĉilo
Maurico
Republic of Mauritius
Flag of Mauritius.svg Coat of arms of Mauritius.svg
Standardo di Maurico Blazono di Maurico
Nacionala himno:
Motherland
LocationMauritius.png
Urbi:
Chefurbo: Port Louis
· Habitanti: 147 688 (2003)
Precipua urbo: Port Louis
Lingui:
Oficala lingui: Angla[1]
Guvernerio:
Tipo: Republiko
· Prezidanto: Barlen Vyapoory
· Chefministro: Pravind Jugnauth
Surfaco: (179ma granda)
· Totala: 2 040 km²
· Aquo: 0,05 %
Habitanti: (151ma granda)
· Totala: 1 265 577[2] (2018)
· Denseso di habitantaro: 618,24 hab./km²
Plusa informi:
Valuto: Rupio di Maurico
Veho-latero: sinistre
ISO: MU
MUS
480
Reto-domeno: .mu*
Precipua religio: hinduismo 44%, kristanismo 32,6%, islamo 16,9%


Maurico esas arkipelago e lando jacanta sud-este de Afrika en Indiana oceano, inter Madagaskar, Seycheli e Reunion. Ol distas cirkume 2.000 km este de Afrikana kontinento.

Bazala fakti pri Maurico

Historio[redaktar | redaktar fonto]

 Precipua artiklo: Historio di Maurico

Maurico ja konocabis depos la 10ma yarcento dal Araba maristi, qui nomizis ol Dina Arobi. Portugalani, qui esis l'unesma Europani qui vizitis l'insuli, trovis l'insulo sen habitantaro en 1507. En 1512, Portugalana maristo Pedro de Mascarenhas trovis l'insulo, ed, en lua homajo, navigisto Diogo Rodrigues nomizis li Mascarenhas. Pose, la vicina insuli nomesis insuli Rodrigues, homaje Diogo Rodrigues.

En 1598 l'unesma Nederlandani aparis ed, ye la 20ma di septembro sam yaro, li nomizis l'insulo Prins Maurits van Nassaueiland (Insulo di Princo Mauritius, origino di nuna nomo "Maurico") memoriginta Nederlandana princo Johan Maurits van Nassau-Siegen. Nederlandani komencis koloniigar l'insulo en 1638 e finis lua koloniigo en 1710.

Franca mapo di 1791 nomizis Maurico Isle de France ("insulo di Francia").

Franci okupis l'insulo en 1710 til la 3ma di decembro 1810, kande Britaniani vinkis Franca armeo en l'insulo ed okupis ol. Britanian administrado, qua komencis kun Robert Townsend Farquhar karakterizis su por rapida ekonomiala e sociala chanji. un ek la maxim importanta esis l'aboliso di sklaveso en 1835. Agrokultivisti recevis indemni di du milion Britaniana pundi por la perdajo di lua sklavi, importita de Afrika e Madagaskar dum Franca dominacajo. Pos l'aboliso di la sklaveso, Indiani enmigranti komencis arivar en l'insulo quale libera laboristi por remplasar la sklavi.

Elekti por legifal asemblajo qui eventis en 1947, vinkesis da Labour Party e markizis la fino di dominacajo di Franca-parolanti en la politiko dil insulo, e l'unesma pazo por futura nedependo. La kampanio por nedependo kreskis pos 1961, ed en 1965 Britaniani separis l'arkipelago Chagos del teritorio di Maurico por krear la Britaniana teritorio en Indiana Oceano ed uzar ta insuli en defensiva strategii kun Usa.

La nedependo di Maurico eventis ye la 12ma di marto 1968, kom membro di la "Commonwealth". Ye la 12ma di marto 1992 la lando divenis republiko.

Politiko[redaktar | redaktar fonto]

Nacional Asemblitaro di Maurico.
Sideyo dil chefministro di Maurico.

Maurico esas parlamentala republiko. La chefo di stato esas la prezidanto, qua elektesas da la parlamento por 5 yari. La chefo di guvernerio esas la chefministro, qua elektesas da la prezidanto. La prezidanto indikas l'altra ministri, kun la helpo di la chefministro. La konstituco di Maurico adoptesis ye la 12ma di marto 1968, dio di la nedependo di la lando.

La parlamento havas unika chambro, la Nacional Asemblitaro (National Assembly), kun 70 membri, di qui 62 elektesas direte dal populo por 4 yari. L'altra 8 membri elektesas da supra korto di la lando, por sekurar ke rasala e religiala minoritati havas reprezenteri en la parlamento.

La bazo di la legala sistemo di Maurico esas l'Angla e la Franca legala sistemi. La supra korto di Maurico havas 6 membri. Ank existas alta apelo-korto.

Geografio[redaktar | redaktar fonto]

Mapo di Maurico kun lua insuli. Lando postulas l'arkipelago di Diego Garcia e l'insulo Tromelin.
Peizajo en la chaso-rezerveyo Domain du Chasseur.

La teritorio di Maurico kreesis per volkanal aktiveso cirkume 8 milion yari ante nun. Lua maxim alta punto esas monto "Piton de la Petite Rivière Noire", kun 828 m sur marala nivelo. L'insuli Rodrigues, jacanta 560 km nord-este de Maurico, l'insuli Agaléga, kun 289 habitanti e 1.100 km norde de Maurico, ed anke l'arkipelago Cargados Carajos anke esas parto di la lando.

Maurico havas tropikala klimato kun oceanal influo. La pluvoza sezono eventas de novembro til aprilo. L'yarala mezavalora pluvo-quanto varias de 900 mm en litoro til 1.500 mm en alta regioni. La mezavalora temperaturo varias de 20.4 °C dum vintro til 24.7 °C dum somero. Cikloni povas eventar de januaro til marto.

En 1993 49,26% de lua sulo uzesis por agrokultivo, e 22% esis boski e foresti. Multa rara speci di animali existas en Maurico, ma l'introdukto di exotika speci minacas la nativa. Dronto esis nativa ucelo qua desaparis en 1681, min kam du yarcenti pos lua deskovro.

Ekonomio[redaktar | redaktar fonto]

 Precipua artiklo: Ekonomio di Maurico

Pos la nedependantesko, l'ekonomio di Maurico divenis diversigita. Turismo, stofi, sukro e financi esas la precipua ekonomial agadi di la lando. Recente, komunikala teknologii, pesko e rinovigebla fonti di energio anke divenis importanta.

Demografio[redaktar | redaktar fonto]

Mapo di Maurico kun lua precipua urbi.
Demografiala piramido, segun la kontado di 2011.

Segun statistiki de The World Factbook por julio 2018, Maurico havis 1 364 283 habitanti. Segun la demografiala kontado di 2011, Maurico havis 1 286 340 habitanti, di qui 1 248 129 habitis Maurico e 37 922 habitis Rodrigues. La habitantaro mixas Indian-Mauricani, kreoli, Chinian-Mauricani, Franca Mauricani ed Angla-Mauricani. De 1972 til nun, la demografiala kontadi ne havas inquesti pri raso.[3]

La linguo oficala esas Angla, parolata da min kam 1% de la habitantaro kom matrala linguo. La kreola linguo di Maurico esas la maxim parolata: 86,5%. Bhojpuri parolesas da 5,3%, Franca da 4,1%, 1,4% parolas du lingui, 2,6% parolas altra lingui (inkluzite l'Angla), e 0,1% ne informis lia matrala linguo en 2011.[3] La Franca ank uzesas en televiziono e jurnali.[4]

La procento di habitantaro segun religio esas: hinduismo (48,5%). Katoliki esas 26,3%, Mohamedani esas 17,3%, altra kristani esas 6,4%, altra religii esas 0,6%, sen religio esas 0,7%, e 0,1% ne informis pri religio.[3]

La maxim populoza urbo esas la chef-urbo, Port Louis. Altra importanta urbi esas Rose-Hill, Beau-Bassin, Quatre Bornes, Curepipe e Vacoas-Phoenix.

Kulturo[redaktar | redaktar fonto]

Mauricana koquoarto mixas Indiana, Afrikana, Chiniana ed Europan influi. Atuno, buliono, daube (klasika Provencala disho), civet de lièvre e coq au vin (hano bolieskata kun vino, lardo, fungi, e kelkafoye alio) esas lua precipua dishi. Pipro esas kelkafoye uzata por elaborar li.

La dii kande celebresas Indiana festivali Ratha-Yatra, Ugadi, Maha Shivratree e Thaipoosam Cavadee, Ganesh Chaturthi, Diwali, e la festivalo di la printempo Chiniana esas publika vakancodii. Kristnasko, l'asunciono di la Virgino Maria, e la Mohamedana festo Eid ul-Fitr ank celebresas kom vakancodii.

Pri literaturo, la maxim importanta skriptisti esas Malcolm de Chazal, Ananda Devi, Raymond Chasle, Loys Masson, Marcel Cabon ed Edouard Maunick. La maxim multa skriptisti skribas en la lingui Franca, Angla o Bhojpuri, ma skriptisto Abhimanyu Unnuth skribas en hindi-linguo.

La maxim populara muzikala jenri esas sega, kantata en kreola linguo, qua originis de la muziki kantita e pleita da sklavi, e lua fuziono kun reggae, nomizita seggae. Muziki kantata en Bhojpuri, la muziki di filmi de Bollywood e rock ank esas populara.

La maxim populara sporto en Maurico esas futbalo. Altra populara sporti esas biciklado, tabloteniso, kavalokonkursi, badminton, volebalo, basketbalo, handbalo, boxo, judoo ed altra kombato-sporti, ed atletismo.

Referi[redaktar | redaktar fonto]

Wikipedio
Wikivortaro explikas
ca rubriko
en altra lingui: Maurico
  1. Article 49 of the Constitution National Assembly of Mauritius
  2. Population and Vital Statistics Republic of Mauritius, January - June 2018. Statistics Mauritius. URL vidita ye la 24ma di decembro 2018.
  3. 3,0 3,1 3,2 Africa::Mauritius - The World Factbook. CIA. URL vidita ye la 8ma di julio 2019.
  4. http://www.lemauricien.org/weekend/081116/pam.htm


Nedependanta stati en Afrika
Aljeria | Angola | Benin | Botswana | Burkina Faso | Burundi | Centrafrika | Chad | Demokratial Republiko Kongo | Djibuti | Egiptia | Equatorala Guinea | Eritrea | Etiopia | Gabon | Gambia | Ghana | Guinea | Guinea Bisau | Ivora Rivo | Kabo Verda | Kamerun | Kenia | Komori | Kongo | Lesotho | Liberia | Libia | Madagaskar | Malawi | Mali | Maroko | Maurico | Mauritania | Mozambik | Namibia | Nigeria | Nijer | Ruanda | Sao Tome e Principe | Senegal | Sierra Leone | Seycheli | Somalia | Sudafrika | Sudan | Sud-Sudan | Swazilando | Tanzania | Tunizia | Togo | Uganda | Zambia | Zimbabwe
Dependanta teritorii
Ceuta | Kanarii | Madeira | Melilla | Westala Sahara | Mayotte | Reunion | Sokotra
Nedependi ne agnoskata
Somalilando | Puntlando