Olimpiala Ludi en Tokyo, 2020

De Wikipedio
Salti al navigilo Irez a serchilo
Logotipo* dil Olimpiala Ludi en Tokyo, 2020.

L'Olimpiala Ludi en Tokyo, 2020, od oficale la 32ma Olimpiala Ludi, esas eventonaja internaciona plursporta konkurso qua komence eventus de la 24ma di julio til la 9ma di agosto 2020 en Tokyo, Japonia,[1] ma, pro l'expanso di la pandemio dil viruso COVID-19, l'Internaciona Olimpiala Komitato (IOK) decidis pri lua ajorno, por komencor ye la 23ma di julio e finor ye la 8ma di agosto 2021.[2] Lor l'Olimpiala Ludi eventos duesmafoye en Japonia e quaresmafoye en Azia.

On expektas ke 11 091 atleti de 206 nacioni qui havas Olimpiala komitati partoprenos en ol. Esos 339 eventi de 33 sporti, lor la maxim granda quanto di sporti en ula Olimpiado.

Selekto dil urbo[redaktar | redaktar fonto]

La nova plusporta nacionala stadio di Tokyo.

Komence, tri urbi prizentis kandidatesi por gastigar la ludi: Madrid, Istanbul e Tokyo. Ye la 7ma di septembro 2013, l'IOK kunvenis en Buenos Aires, Arjentinia, por selektar l'eventeyo. Pro ke nula urbo obtenis plu kam 50% ek la voti dum l'unesma votado, pro ke e Istanbul e Madrid egaleskis la quanto di voti, eventis extra votado por decidar quala urbo konkursus kontre Tokyo, lor la maxim bone votita dum l'unesma votado. Istanbul recevis 49 ek la voti, kontre 45 por Madrid. Fine, Tokyo selektesis en la 2ma votado, per 60 voti favorebla kontre 36.

Kandidata urbi por Olimpiala Ludi 2008 - rezulti:[3]
Urbo Lando 1ma votado extra votado 2ma votado
Tokyo Flag of Japan.svg Japonia 42 60
Istanbul Flag of Turkey.svg Turkia 26 49 36
Madrid Flag of Spain.svg Hispania 26 45

La guvernerio di la metropolala regiono di Tokyo rezervis 400-miliard Yen-i (equivalanta a plu kam 3,67 miliard Usana dolari) por pagar la gastigo di la Ludi, inkluzite konstruktar nova ferovoyala lineo por ligar l'aeroportui di Narita e Haneda a la centrala staciono ferovoyala di Tokyo.

Referi[redaktar | redaktar fonto]

  1. (7ma di septembro 2013) Olympics 2020: Tokyo wins race to host Games - BBC Sport (Angla). bbc.co.uk. URL vidita ye la 27ma di februaro 2018.
  2. (30ma di marto 2020) IOC, IPC, Tokyo 2020 Organising Committee and Tokyo Metropolitan Government Announce New Dates for the Olympic and Paralympic Games Tokyo 2020 (Angla). olympic.org. URL vidita ye la 30ma di marto 2020.
  3. (8ma di septembro 2013) - Results of the IOC vote to host the 2020 Summer Olympics - Results of the IOC vote to host the 2020 Summer Olympics (en Angla). Associated Press