Olimpiala Ludi en Tokyo, 2020

De Wikipedio
Irez a navigado Irez a serchilo
Logotipo* dil Olimpiala Ludi en Tokyo, 2020.
Horlojo fotografita ye la 14ma di oktobro 2019 montris quanta dii, hori, minuti e sekundi restis til la komenco di la Ludi en 2020, ante l'ajorno pro l'epidemio di COVID-19.

L'Olimpiala Ludi en Tokyo, 2020, od oficale la 32ma Olimpiala Ludi, esis internaciona plursporta konkurso qua komence eventus de la 24ma di julio til la 9ma di agosto 2020 en Tokyo, Japonia,[1] ma, pro l'expanso di la pandemio dil viruso COVID-19, l'Internaciona Olimpiala Komitato (IOK) decidis ajornar ol, por komencar ye la 23ma di julio e finar ye la 8ma di agosto 2021.[2] Lor la Somerala Olimpiala Ludi eventis duesmafoye en Japonia e quaresmafoye en Azia. Nova sporta konkursi e modalesi introduktesis, exemple pri basketbalo 3x3 e planko-sketado en du modalesi, street e park, por viri e por mulieri, e triatlo por mixita esquado (du viri e du mulieri) kun relayo di atleti.

Entote 11 306 atleti de 205 nacioni qui havas Olimpiala komitati, e pluse grupo di refujinta atleti, partoprenis ol. Esis 339 eventi de 33 sporti, lor la maxim granda quanto di sporti en ula Olimpiala Ludi.

Selekto dil urbo[redaktar | redaktar fonto]

La nova plusporta Nacionala Stadio di Japonia.

Komence, tri urbi prizentis kandidatesi por gastigar la ludi: Madrid, Istanbul e Tokyo. Ye la 7ma di septembro 2013, l'IOK kunvenis en Buenos Aires, Arjentinia, por selektar l'eventeyo. Pro ke nula urbo obtenis plu kam 50% ek la voti dum l'unesma votado, pro ke e Istanbul e Madrid egaleskis la quanto di voti, eventis extra votado por decidar quala urbo konkursus kontre Tokyo, lor la maxim bone votita dum l'unesma votado. Istanbul recevis 49 ek la voti, kontre 45 por Madrid. Fine, Tokyo selektesis en la 2ma votado, per 60 voti favorebla kontre 36.

Kandidata urbi por Olimpiala Ludi 2008 - rezulti:[3]
Urbo Lando 1ma votado extra votado 2ma votado
Tokyo Flag of Japan.svg Japonia 42 60
Istanbul Flag of Turkey.svg Turkia 26 49 36
Madrid Flag of Spain.svg Hispania 26 45

La guvernerio di la metropolala regiono di Tokyo rezervis 400-miliard Yen-i (equivalanta a plu kam 3,67 miliard Usana dolari) por pagar la gastigo di la Ludi, inkluzite konstruktar nova ferovoyala lineo por ligar l'aeroportui di Narita e Haneda a la centrala staciono ferovoyala di Tokyo. La moderna Nacionala Stadio di Japonia (国立競技場, Kokuritsu kyōgijō), kun kapaceso por 68 mil spektanti, konstruktesis po 1,4 miliard dolari de 2014 til 2019, por gastigar l'inauguro-ceremonio, atletala konkursi e la klozo-ceremonio.

L'impakto di koronaviruso en la Ludi[redaktar | redaktar fonto]

Loko por mezurar temperaturo di atleti e jurnalisti ante enirar teniso-ludeyi, en Ariake.
Transporto di Olimpiala torcho mantenanta sociala disto en Mibu, Tochigi, Japonia.

Pro la pandemio di COVID-19, Unesmafoye en la historio, l'Olimpiala Ludi ajornesis, vice esar abrogata.[4] Segun studio dal profesoro Katsuhiro Miyamoto, del Universitato Kansai, la kusto por ajurnar 1 yaro l'Olimpiala Ludi e la Paralimpiala Ludi esis 640,8 miliard yen, o 5,8 miliard Usana dolari, inkluzite la manteno di stadii sen uzo.[5] Populara suporto a la Ludi diminutis en Japonia depos ke la quanto di personi infektita da COVID-19 en la lando komencis augmentar.

Pro sucii pri la posibla transmiso di koronaviruso en granda aglomeraji e la lenta vacinizo en Japonia, l'Olimpiala Komitato decidis interdiktar l'asisto di publiko en stadii, krear loki por kontrolar la temperaturo di omna personi qui asistis la ludi (atleti, entrenisti, jurnalisti e suporto-personaro), facar rapida testi pri COVID-19, e mantenar atleti e teknikala personaro en arei separita de la cetera habitanti. Li mustis anke sequar la normi pri uzo di maskili, mantenar sociala disti, inter altri. L'O Pro interna restrikti pri movado, nula internaciona gasti aceptesis.

La relayo dil Olimpiala flamo ank adaptesis a la protokoli e restrikti por preventar la dissemo di COVID-19. Festi e la tradicionala fanfaro ne eventis, e la relayo di la torchi facesis manteninta sociala disto. La partopreninti e spektinti mustis uzar maskili. En multa loki la paso di la torcho kancelesis.[6]

Ye la 22ma di julio, la chefo di la komitato qua organizis l'Olimpiala Ludi en Tokyo anuncis ke de la 32 mil personi qui arivis al urbo e de preske 100 mil COVID-testi facita, nur 87 esis pozitiva, e ca rezulto judikesis kom bona.[7]

L'Olimpiala flamo e l'inauguro-ceremonio[redaktar | redaktar fonto]

Piroteknajo dum l'nauguro-ceremonio di la ludi.
L'Olimpiala flamo, protektita per lanterno en Tokyo.

L'Olimpiala flamo acendesis ye la 12ma di marto 2020 en Olimpia, Grekia e transportesis ad Athina, ube ol arivis che stadio Panathinaikos ye la 19ma di marto. Dum ca epoko, multa landi ja klozabis lia frontieri, do ne esis posibla transportar ol per tero. La transferesis a lanterno e transportesis per aviono a Japonia, por montresar en Nahara, Fukushima dum 1 monato. Pose ol transferesis al urbo-domo di Tokyo. Pos la decido pri ajornar la ludi, ye la 9ma di agosto 2020 decidesis ke la relayo dil Olimpiala flamo durigos de Nahara, Fukushima, ye la 25ma di marto 2021, preske 1 yaro pos l'antee projetita dato.

Dum l'inauguro-ceremonio probesis mantenar la sociala disto inter l'artisti, l'atleti e l'autoritatozi. Tota la membri de nacionala delegacioni eniris portanta maskili che facio. L'esforci di atleti, qui duris entrenar malgre l'ajorno o mem kancelo di konkursi, e l'esforco di mediki e flegisti dum la pandemio homajesis dum tota ceremonio. Exemple, Japoniana boxistino Arisa Tsubata, qua ank esis flegistino, e ne povis preparar su por la Ludi, nam la selekto-konkurso qua eventus en Paris en 2021 kancelesis. Tsubota aparis en la ceremonio kuranta sur kur-bendo, uzanta blanka uniformo por homajar l'esforci di mediki e flegisti dum la pandemio.[8]

Simile a quo eventis en Rio de Janeiro en 2016, du kaldroni por l'olimpiala flamo kreesus: un interne Nacionala Stadio, ed altru proxim la Ponto di Sonji, che quartero Odaiba. Japoniana tenisistino Naomi Osaka encendis l'Olimpiala kaldrono che Nacionala Stadio ye la 23ma di julio 2021.

La partopreno di Rusa Olimpiala Komitato, di atleti refujinti, e di atleti transgenri[redaktar | redaktar fonto]

Standardo di Rusa Olimpiala komitato

Pos la skandalo pri dopado di Rusa atleti ante l'Olimpiala Ludi di 2016, Rusa Olimpiala komitato suspensesis dal Internaciona Olimpiala Komitato en 2017. Tamen, en februaro 2018, Rusia itere permisesis partoprenar la Vintrala Olimpiala Ludi. Ye la 9ma di decembro 2019, Mondala Agenterio Kontre Dopado (Angle: World Anti-Doping Agency, abreviuro WADA) proskriptis la partopreno di Rusia en tota sporta konkursi dum 4 yari. Rusia apelis a Sporta Arbitro-Korto (Angle: Court of Arbitration for Sport, abreviuro CAS), qua decidis diminutar la puniso: vice proskriptar la partopreno di Rusa atleti dum quar yari, ol decidis ke l'atleti povus konkursar, ma dum du yari li nek povus uzar la nomo, la standardo o la himno di Rusia, nek povus portar la nomo Russia en lia uniformi. Ye la 19ma di februaro 2021 anuncesis ke Rusi uzus l'abreviuro "ROC" por identifikar su, ed uzus la standardo di Rusa Olimpiala komitato. Ye la 22ma di aprilo decidesis ke vice la nacionala himno Rusa, li uzus Piano Concerto No. 1 da Pyotr Chaikovski.[9]

L'esquado pri refujinta atleti (Angle: Refugee Olympic Team, abreviita IOC; France: Équipe olympique des réfugiés, abreviita EOR) kreesis dal Internaciona Olimpiala Komitato[10] e konkursis unesmafoye en l'Olimpiala Ludi en Rio de Janeiro, 2016. Dum la Ludi en Tokyo ca esquado konsistis ek 29 atleti de 11 landi, qui konkursi en 12 sporta modalesi.[10][11] Li naskis en Siria, Sud-Sudan, Venezuela,[11], Sudan, Eritrea, Republiko Kongo, Afganistan, Iran, Demokratial Republiko Kongo, Irak e Kamerun. Dum l'inauguro-ceremonio, li paradis sub la flago dil Internaciona Olimpiala Komitato. Natistino Yusra Mardini, naskinta en Siria, e Tachlowini Gabriyesos longa-dista atleto naskinta en Eritrea, portis l'Olimpiala standardo.

En Tokyo, unesmafoye en la Ludi eventis la partopreno di transgenra atleti. Laurel Hubbard, 43-yar-evanta halterlevisto de Nova-Zelando, konkursis en la kategorio por atletini til 87 kilogrami, irgakaze meze debato se el devus partoprenar.[12] Kanadana feminala futbalo-esquado anke havas atleto, Quinn, qua identifikas su kom "ne-binara", to esas, nek muliero, nek viro.[13] Quinn recevis ora medalio kande Kanadana esquado vinkis Suedia en la lasta futbalo-partio por mulieri de la Ludi.

Incidento kun atletino Bielorusa[redaktar | redaktar fonto]

Bielorusa atletino Krystsina Tsimanouskaya kapabligis su por 100-metra e 200-metra kurado por mulieri. Ye la 30ma di julio el akuzis autoritatozi de Bielorusa Olimpiala Komitato, prezidata da Viktor Lukashenko, filiulo de Bielorusa prezidanto Alexander Lukashenko, pri koaktar el konkursar anke la 4x400 metra relaya kurado sen elua konsento. Ye la 1ma di agosto el transportesis del Olimpiala vilajo en Tokyo al aeroportuo Haneda por sendesar a Bielorusia. El refuzis embarkar, e protektesis da Japoniana polico, ante demandar politikal azilo a Polonia. Ye la 2ma di agosto, Polonia donis "humana visto" a Tsimanouskaya por refujar su.[14]

Kelka eventi e rezulti[redaktar | redaktar fonto]

L'unesma ora medalio de la ludi ganesis da Chiniana sporta pafistino Yang Qian, pri 10-metra-dista pafado per karabino, obtenanta 251,8 punti. Anastasiia Galashina, ludanta por Rusa Olimpiala komitato, ganis l'arjenta, e Nina Christen, de Suisia, ganis la bronza.[15]

Vitalina Batsarashkina, ludanta por Rusa Olimpiala komitato, ganis ora medalio pri 10-metra sporta pafado per pistolo per kompresita aero por mulieri. Antoaneta Kostadinova Boneva ganis l'arjenta, e Jian Ranxin de Popul-Republiko Chinia ganis la bronza.[16] Vitalina Batsarashkina anke ganis l'ora medalio pri 25-metra sporta pafado per pistolo. Sudkoreana Kim Min-jung ganis l'arjenta, e Xiao Jiaruixuan de Popul-Republiko Chinia ganis la bronza.

Pri 10-metra sporta pafado per karabino per kompresita aero por viri, Usano William Shaner ganis l'ora medalio, Sheng Lihao de Popul-Republiko Chinia ganis l'arjenta medalio, e lua samalandano Yang Haoran ganis la bronza.

Pri skerm-arto per espado individuala por mulieri, Sun Yiwen de Popul-Republiko Chinia ganis l'ora, Ana Maria Popescu de Rumania ganis l'arjenta,[17] e Katrina Lehis de Estonia ganis la bronza. Pri skerm-arto per espado por viri, modaleso individuala, Romain Cannone de Francia ganis l'ora, Gergely Siklósi de Hungaria ganis l'arjenta, e Igor Reizlin de Ukrainia ganis la bronza.[16]

Pri skerm-arto per floreto individuala por mulieri, Usanino Lee Kiefer ganis l'ora medalio. El vinkis Inna Deriglazova de Rusia per 15-13.[16] Larisa Korobeynikova, anke de Rusia, ganis la bronza.[18]

Pri arkpafado por mixita esquadi (1 viro e 1 muliero), Sud-Koreani An San e Kim Je Deok ganis l'ora, Nederlandani Gabriela Schloesser e Steve Wijler ganis l'arjenta, e Mexikiani Alejandra Valencia e Luis Antonio Álvarez Murillo ganis la bronza.[19] Sud-Koreanino An San anke ganis du altra ora medalii, pri arkpafado individuala, e por feminal esquado, ensemble kun Jang Min-hee e Kang Chae-young.

Pri halterlevo por mulieri, kategorio por 49-kilograma konkursanti, l'ora medalio ganesis da Hou Zhihui, de Popul-Republiko Chinia. Indianino Saikhom Mirabai Chanu ganis l'arjenta, kontre ke Windy Cantika Aisah de Indonezia ganis la bronza.[20] Pri halterlevo por mulieri, kategorio por 55-kilograma konkursanti, Filipinanino Hidilyn Diaz ganis l'ora, Liao Qiuyun de Popul-Republiko Chinia ganis l'arjenta, e Zulfiya Chinshanlo de Kazakstan ganis la bronza.

Pri halterlevo por viri, kategorio por 61-kilograma konkursanti, Popul-Republiko Chinia ganis l'ora kun Li Fabin, Indoneziano Eko Yuli Irawan ganis l'arjenta, ed Igor Son de Kazakstan ganis la bronza.

Pri taekwondo por viri, kategorio por 80-kilograma konkursanti, Maksim Khramtsov de Rusia ganis l'ora, Saleh Elsharabaty de Jordania ganis l'arjenta,[21] e du atleti, Toni Kanaet de Kroatia e Seif Eissa de Egiptia, ganis la bronza. Pri taekwondo por mulieri, kategorio til 49-kilograma konkursanti, Tailandanino Panipak Wongpattanakit ganis l'ora medalio, Hispanianino Adriana Cerezo ganis l'arjenta, e Tijana Bogdanović de Serbia e Avishag Semberg de Israel ganis la bronza.[22]

Pri planko-sketado modaleso street por viri, Japoniano Yuto Horigome ganis la ora, Kelvin Hoefler de Brazilia ganis l'arjenta, e Jagger Eaton de Usa ganis la bronza.[23] Pri planko-sketado modaleso street por mulieri, la 13-yari evanta Momiji Nishiya de Japonia ganis l'ora, Brazilianino Rayssa Leal ganis l'arjenta, e Funa Nakayama de Japonia ganis la bronza. Momiji Nishiya e Rayssa Leal divenis, rispektive la maxim yuna Japonianino e la maxim yuna Brazilianino qui ganis ula Olimpiala medalio.[24][25]

Martine Grael e Kahena Kunze, de Brazilia, ganis ora medalio pri navigado per seglo-batelo kategorio "49erFX" por mulieri. En la sama konkurso, Germana Tina Lutz e Susann Beucke ganis l'arjenta, e Annemiek Bekkering ed Annette Duetz de Nederlando ganis la bronza. En la kategorio "470" por mulieri, Britanianini Hannah Mills ed Eilidh McIntyre ganis l'ora, Polonianini Agnieszka Skrzypulec e Jolanta Ogar ganis l'arjenta, e Franca Camille Lecointre ed Aloïse Retornaz ganis la bronza.

Pri teniso por mulieri, modaleso por singla ludisto, Belinda Bencic de Suisia ganis l'ora, Markéta Vondroušová de Chekia ganis l'arjenta, ed Elina Svitolina de Ukraina ganis la bronza.[26]

Pri kavalk-arto, Jessica von Bredow-Werndl de Germania ganis l'ora medalio pri kavalodresado individuala por mulieri, kavalkanta kavalino Dalera.[27] Lua samalandano Isabell Werth ganis l'arjenta, e Charlotte Dujardin del Unionita Rejio ganis la bronza.

Natado[redaktar | redaktar fonto]

Aquala Centro di Tokyo.

La konkursi pri natado e plunjado eventis en l'Aquala Centro di Tokyo (東京アクアティクスセンター (Tōkyō akuatikusu sentā)), qua komencis esar konstruktita en aprilo 2017 por inaugurar ye la 22ma di marto 2020. Tamen, pro l'epidemio di koronaviruso, l'inauguro ajornesis til la 26ma di oktobro 2020. L'Aquala Centro havas kapaceso por 15 mil spektanti, e kustis 56,7 miliard yen.

Pri 400-metra natado variata stili individuala por viri, Usani Chase Kalisz e Jay Litherland ganis rispektive l'ora e l'arjenta, ed Australiano Brendon Smith ganis la bronza.[28]

Pri 400-metra natado libera stilo individuala por viri, Ahmed Hafnaoui ganis l'ora medalio, Jack Alan McLoughlin de Australia ganis l'arjenta, e Kieran Smith de Usa ganis la bronza.[29][16] Pri la sama modaleso por mulieri, Ariarne Titmus de Australia ganis l'ora, Usanino Katie Ledecky ganis l'arjenta, e Chinianino Li Bingjie ganis la bronza.[30]

Pri 400-metra natado variita stili individuala por mulieri, Yui Ohashi de Japonia ganis la ora, Emma Weyant de Usa ganis l'arjenta, e Hali Flickinger ganis la bronza.[16]

Pri 200-metra natado libera stilo individuala por viri, Britaniani Thomas Dean e Duncan William Scott ganis rispektive l'ora e l'arjenta, e Braziliano Fernando Scheffer ganis la bronza.[31]

Pri 50-metra natado libera stilo por viri, la maxim rapida konkurso pri natado de la Ludi, Caeleb Dressel de Usa ganis l'ora, Florent Manadou de Francia ganis l'arjenta, e Bruno Fratus, de Brazilia, ganis la bronza.[32]

Pri natala maratono (10-kma-natado) por mulieri, Brazilianino Ana Marcela Cunha ganis l'ora, Nederlandanino Sharon Van Rouwendaal ganis l'arjenta, ed Australianino Kareena Lee ganis la bronza.[33]

Gimnastiko[redaktar | redaktar fonto]

Pri gimnastiko por mulieri, modaleso por esquadi, Rusa Olimpiala komitato ganis l'ora, Usana esquado, sen la partopreno di Simone Biles, ganis l'arjenta, e Britaniana esquado ganis la bronza.[34] Pri gimnastiko por viri, modaleso por esquadi, Rusa Olimpiala komitato anke ganis l'ora medalio. Japoniana esquado ganis l'arjenta, e Chiniana esquado ganis la bronza.[35]

Simone Biles decidis ne partoprenar kelka konkursi individuala e por esquadi alegante medikala motivi.[34] Tamen el durigis konkursar en la lasta modaleso, l'equilibro-trabo, ube el ganis la bronza medalio. L'ora e l'arjenta ganesis da du Chinianini, Guan Chenchen e Tang Xijing, rispektive.[36]

Rebeca Andrade ganis l'unesma ora medalio pri gimnastiko por Brazilia, por salto sur selo.[37] En la sama konkurso, Usanino Mykayla Skinner ganis l'arjenta, ed Seojeong Yeo, de Sud-Korea, ganis la bronza.[38]

Pri gimnastiko por viri sur sulo, Artem Dolgopyat de Israel ganis l'ora, Rayderley Zapata de Hispania ganis l'arjenta, e Xiao Ruoteng de Popul-Republiko Chinia ganis la bronza.

Atletismo[redaktar | redaktar fonto]

Flora Duffy, atletino de Bermuda, ganis l'unesma ora Olimpiala medalio di la historio di lua lando, pri triatlo. Georgia Taylor-Brown, del Unionita Rejio, ganis l'arjenta, ed Usanino Katie Zaferes ganis la bronza.[39]

Pri triatlo por mixita esquado kun relayo, modaleso introduktita en ca Olimpiala Ludi, Britaniana esquado, konsistanta ek Jessica Learmonth, Jonathan Brownlee, Georgia Taylor-Brown ed Alex Yee ganis l'ora medalio. Usana esquado (Katie Zaferes, Kevin McDowell, Taylor Knibb e Morgan Pearson) ganis l'arjenta, e Franca esquado (Léonie Périault, Dorian Coninx, Cassandre Beaugrand e Vincent Luis) ganis la bronza.

Pri 100-metra kurado por mulieri, tri Jamaikani ganis omna medalii: Elaine Thompson-Herah ganis l'ora, Shelly-Ann Fraser-Pryce ganis l'arjenta, e Shericka Jackson ganis la bronza. Elaine Thompson-Herat an establisis nova mondala rekordo pri 100-metra kurado por mulieri: 10.61 sekundi. L'antea rekordo, 10.62 sekundi, establisesis da Florence Griffith-Joyner dum l'Olimpiala Ludi en Seoul, 1988[40]

Pri 100-metra kurado por viri, Italiano Lamont Marcell Jacobs parkuris la treko en 9.8 sekundi e ganis l'ora. Usano Fred Kerley ganis l'arjenta, e Kanadano Andre de Gasse ganis la bronza.[41]

Porto-Riko ganis la duesma ora medalio de lua historio kande Jasmine Camacho-Quinn vinkis 100-metra kurado kun hurdi por mulieri.[42] Usanino Keni Harrison ganis l'arjenta, e Jamaikanino Megan Tapper ganis la bronza.[43]

Pri 5000-metra kurado por mulieri, Nederlandano Sifan Hassan ganis l'ora, Hellen Obiri de Kenia ganis l'arjenta, e Gudaf Tsegay de Etiopia ganis la bronza. Haissan rekperis su pos falar a sulo dum la 1500-metra klasifiko-kurado.[44]

Pri 10-mil-metra kurado por viri, Selemon Barega de Etiopia ganis l'ora, Joshua Cheptegei de Uganda ganis l'arjenta, e Jacob Kiplimo ganis la bronza.[45]

En Tokyo unesmafoye en la historio dil Olimpiala Ludi eventis konkurso pri 4x400-metra relayo-kurado por mixita esquado, singla esquado havanta du viri e du mulieri.[46] Partoprenis 16 esquadi, de qui 8 selektesis por la finala konkurso. Polona esquado, konsistanta ek Karol Zalewski, Natalia Kaczmarek, Justyna Święty-Ersetic e Kajetan Duszyński ganis l'ora medalio. L'arjenta ganesis da Lidio Andrés Feliz, Marileidy Paulino, Anabel Medina ed Alexander Ogando, de Dominikana Republiko, kontre ke la bronza ganesis da Usana esquado, konsistanta ek Liemarvin Bonevacia, Lieke Klaver, Femke Bol, e Ramsey Angela.

Pri disko-lansado, Daniel Ståhl e Simon Pettersson, ambe de Suedia, ganis rispektive l'ora e l'arjenta. La bronza ganesis da Lukas Weißhaidinger, Austriano.[47]

Pri triopla salto por mulieri, Venezuelano Yulimar Rojas ganis l'ora, Patrícia Mamona de Portugal ganis l'arjenta, ed Ana Peleteiro, de Hispania, ganis la bronza.[48]

Pri maratono por mulieri, Keniani Peres Jepchirchir e Brigid Kosgei ganis l'ora e l'arjenta medalii, rispektive. Usano Molly Seidel ganis la bronza.[49] Pri maratono por viri, altra Keniano, Eliud Kipchoge, ganis l'ora. L'arjenta e la bronza ganesis da Abdi Nageeye e Bashir Abdi, ambe naskinta en Somalia, ma nun konkursanta rispektive por Nederlando e Belgia.[50]

Volebalo, basketbalo e futbalo[redaktar | redaktar fonto]

Stadio Ariake Arena.

Volebalo-partii eventis en la stadio Ariake Arena, anke konocata kom Tokyo Arena, inaugurita ye la 9ma di decembro 2019. Pri volebalo por viri, Franca esquado ganis l'ora, Rusa Olimpiala komitato ganis l'arjenta, ed Arjentinia ganis la bronza, pos vinkir Brazilia.[51] Pri volebalo por mulieri, Usana esquado vinkis Braziliana en la lasta partio e ganis l'ora medalio. La bronza ganesis da Serbia.[52]

Pri plajo-volebalo por viri, Norvegiani Anders Mol e Christian Sorum ganis l'ora, pos vinkir Rusi Vlacheslav Krasilnikov e Oleg Stoyanovski en la lasta partio.[53] Cherif Younousse e Ahmed Tijan de Katar ganis la bronza, pos vinkir Martin Plavins ed Edgar Tocs, de Latvia.[53] Pri plajo-volebalo por mulieri, April Ross ed Alix Klineman de Usa vinkis Australiani Taliqua Clancy e Mariafe Artacho del Solar en la lasta partio e ganis l'ora medalio.[54] La bronza ganesis da Suisi Joana Heidrich ed Anouk Verge-Depre.[55]

Jill Biden, spozino de Usana prezidanto, gratulas Usana esquado por la medalio pri basketbalo 3x3.
Stadio Saitama Super Arena

La konkursi pri basketbalo, inkluzite basketbalo 3x3 eventis en la stadio Saitama Super Arena, inaugurita en 1997 che urbo Saitama. Pri basketbalo 3x3 por mulieri, Usana esquado ganis l'ora medalio, Rusa Olimpiala komitato ganis l'arjenta, e Popul-Republiko Chinia ganis la bronza.[56] Pri basketbalo 3x3 por viri, Latviana esquado ganis l'ora, Rusa Olimpiala komitato ganis l'arjenta, e Serbia ganis la bronza.

Pri basketbalo por viri, Usana esquado ganis l'ora medalio, pos vinkir la Franca per 87 punti kontre 82. Australia ganis la bronza, pos vinkir Slovenia per 107 punti kontre 93. Pri basketbalo por mulieri, Usana esquado vinkis Japoniana per 90 punti kontre 75 e ganis l'ora.[57] Franca esquado granis la bronza, pos vinkir Serbiana per 91 punti kontre 76.

Pri futbalo por viri, Braziliana esquado ganis l'ora, pos vinkir Hispania per 2x1.[58] La bronza ganesis da Mexikiana esquado, pos vinkir Japoniana per 3x1.[59] Pri futbalo por mulieri, Kanadana esquado vinkis Suediana en disputo per maxima puniso per 3x2, pos ke la du esquadi egaleskis per 1x1 en l'ordinara tempo e duris l'egalesko dum l'adicionala tempo.[60] Usana esquado ganis la bronza, pos vinkir Australia per 4x3.[61]

Medalii ganita[redaktar | redaktar fonto]

Gimnastiko-eventeyo di Ariake.
Braziliana futbalo-esquado.
Klozo-ceremonio en Tokyo.
Festo en Paris, dum transfero-ceremonio di la Ludi.

Yen la listo di landi qui recevis adminime 1 bronza medalio che Olimpiala Ludi en Tokyo.[62]

# Lando Ora Arjenta Bronza Entote
1 Flag of the United States.svg Usa 39 41 33 113
2 Flag of the People's Republic of China.svg PR Chinia 38 32 18 88
3 Flag of Japan.svg Japonia 27 14 17 58
4 Flag of the United Kingdom.svg Unionita Rejio 22 21 22 65
5 Rusa atleti 20 28 23 71
6 Flag of Australia.svg Australia 17 7 22 46
7 Flag of the Netherlands.svg Nederlando 10 12 14 36
8 Flag of France.svg Francia 10 12 11 33
9 Flag of Germany.svg Germania 10 11 16 37
10 Flag of Italy.svg Italia 10 10 20 40
11 Flag of Canada.svg Kanada 7 6 11 24
12 Flag of Brazil.svg Brazilia 7 6 8 21
13 Flag of New Zealand.svg Nova-Zelando 7 6 7 20
14 Flag of Cuba.svg Kuba 7 3 5 15
15 Flag of Hungary.svg Hungaria 6 7 7 20
16 Flag of South Korea.svg Sud-Korea 6 4 10 20
17 Flag of Poland.svg Polonia 4 5 5 14
18 Flag of the Czech Republic.svg Chekia 4 4 3 11
19 Flag of Kenya.svg Kenia 4 4 2 10
20 Flag of Norway.svg Norvegia 4 2 2 8
21 Flag of Jamaica.svg Jamaika 4 1 4 9
22 Flag of Spain.svg Hispania 3 8 6 17
23 Flag of Sweden.svg Suedia 3 6 0 9
24 Flag of Switzerland.svg Suisia 3 4 6 13
25 Flag of Denmark.svg Dania 3 4 4 11
26 Flag of Croatia.svg Kroatia 3 3 2 8
27 Flag of Iran.svg Iran 3 2 2 7
28 Flag of Serbia.svg Serbia 3 1 5 9
29 Flag of Belgium.svg Belgia 3 1 3 7
30 Flag of Bulgaria.svg Bulgaria 3 1 2 6
31 Flag of Slovenia.svg Slovenia 3 1 1 5
32 Flag of Uzbekistan.svg Uzbekistan 3 0 2 5
33 Flag of Georgia.svg Gruzia 2 5 1 8
34 Flag of the Republic of China.svg Taiwan 2 4 6 12
35 Flag of Turkey.svg Turkia 2 2 9 13
36 Flag of Greece.svg Grekia 2 1 1 4
37 Flag of Uganda.svg Uganda 2 1 1 4
38 Flag of Ecuador.svg Equador 2 1 0 3
39 Flag of Ireland.svg Republiko Irlando 2 0 2 4
40 Flag of Israel.svg Israel 2 0 2 4
41 Flag of Qatar.svg Katar 2 0 1 3
42 Flag of the Bahamas.svg Bahama 2 0 0 2
43 Flag of Kosovo.svg Kosovo 2 0 0 2
44 Flag of Ukraine.svg Ukraina 1 6 12 19
45 Flag of Belarus.svg Bielorusia 1 3 3 7
46 Flag of Romania.svg Rumania 1 3 0 4
47 Flag of Venezuela.svg Venezuela 1 3 0 4
48 Flag of India.svg India 1 2 4 7
49 Flag of Hong Kong.svg Hong Kong 1 2 3 6
50 Flag of the Philippines.svg Filipini 1 2 1 4
51 Flag of Slovakia.svg Slovakia 1 2 1 4
52 Flag of South Africa.svg Sudafrika 1 2 0 3
53 Flag of Austria.svg Austria 1 1 5 7
54 Flag of Egypt.svg Egiptia 1 1 4 6
55 Flag of Indonesia.svg Indonezia 1 1 3 5
56 Flag of Ethiopia.svg Etiopia 1 1 2 4
57 Flag of Portugal.svg Portugal 1 1 2 4
58 Flag of Tunisia.svg Tunizia 1 1 0 2
59 Flag of Estonia.svg Estonia 1 0 1 2
60 Flag of Fiji.svg Fidji 1 0 1 2
61 Flag of Latvia.svg Latvia 1 0 1 2
62 Flag of Thailand.svg Tailando 1 0 1 2
63 Flag of Bermuda.svg Bermuda 1 0 0 1
64 Flag of Morocco.svg Maroko 1 0 0 1
65 Flag of Puerto Rico.svg Porto-Riko 1 0 0 1
66 Flag of Colombia.svg Kolumbia 0 4 1 5
67 Flag of Azerbaijan.svg Azerbaijan 0 3 4 7
68 Flag of the Dominican Republic.svg Dominikana Republiko 0 3 2 5
69 Flag of Armenia.svg Armenia 0 2 2 4
70 Flag of Kyrgyzstan.svg Kirgizistan 0 2 1 3
71 Flag of Mongolia.svg Mongolia 0 1 3 4
72 Flag of Argentina.svg Arjentinia 0 1 2 3
73 Flag of San Marino.svg San Marino 0 1 2 3
74 Flag of Jordan.svg Jordania 0 1 1 2
75 Flag of Malaysia.svg Malaizia 0 1 1 2
76 Flag of Nigeria.svg Nigeria 0 1 1 2
77 Flag of Bahrain.svg Bahrain 0 1 0 1
78 Flag of Saudi Arabia.svg Saudi-Arabia 0 1 0 1
79 Flag of Lithuania.svg Lituania 0 1 0 1
80 Flag of Macedonia.svg Norda Macedonia 0 1 0 1
81 Flag of Namibia.svg Namibia 0 1 0 1
82 Flag of Turkmenistan.svg Turkmenistan 0 1 0 1
83 Flag of Kazakhstan.svg Kazakstan 0 0 8 8
84 Flag of Mexico.svg Mexikia 0 0 4 4
85 Flag of Finland.svg Finlando 0 0 2 2
86 Flag of Botswana.svg Botswana 0 0 1 1
87 Flag of Burkina Faso.svg Burkina Faso 0 0 1 1
88 Flag of Cote d'Ivoire.svg Ivora Rivo 0 0 1 1
89 Flag of Ghana.svg Ghana 0 0 1 1
90 Flag of Grenada.svg Grenada 0 0 1 1
91 Flag of Kuwait.svg Kuwait 0 0 1 1
92 Flag of Moldova.svg Moldova 0 0 1 1
93 Flag of Syria.svg Siria 0 0 1 1

Referi[redaktar | redaktar fonto]

  1. (7ma di septembro 2013) Olympics 2020: Tokyo wins race to host Games - BBC Sport (Angla). bbc.co.uk. URL vidita ye la 27ma di februaro 2018.
  2. (30ma di marto 2020) IOC, IPC, Tokyo 2020 Organising Committee and Tokyo Metropolitan Government Announce New Dates for the Olympic and Paralympic Games Tokyo 2020 (Angla). olympic.org. URL vidita ye la 30ma di marto 2020.
  3. (8ma di septembro 2013) - Results of the IOC vote to host the 2020 Summer Olympics - Results of the IOC vote to host the 2020 Summer Olympics (en Angla). Associated Press
  4. (24ma di marot 2020) Olympics history: Have the Games been postponed before? (Angla). Los Angeles Times.
  5. (23ma di marto 2020) 東京五輪・パラ 1年延期の経済損失 6400億円余 専門家試算 (Japoniana). NHK.
  6. (13ma di julio 2021) Torch relay forced to change route amid COVID-19 pandemic crisis in Japan (Angla). SABC News. URL vidita ye la 27ma di julio 2021.
  7. (22ma di julio 2021) COVID infections haunt Olympics despite precautions (Angla). Nikkei Asia. URL vidita ye la 24ma di julio 2021.
  8. Japanese boxer nurse revives Olympic dreams after opening show. REUTERS. URL vidita ye la 27ma di julio 2021.
  9. Tchaikovsky Selection To Replace Banned Russian Anthem At Tokyo, Beijing Olympics (Angla). RadioFreeEurope/RadioLiberty. URL vidita ye la 24ma di mayo 2021.
  10. 10,0 10,1 29 refugee athletes to send a message of solidarity and hope to the world at the Olympic Games Tokyo 2020. URL vidita ye la 8 2021.
  11. 11,0 11,1 (26ma di julio 2021) These are the refugee athletes at the Tokyo Olympics (Angla). World Economic Forum. URL vidita ye la 2ma di agosto 2021.
  12. (31ma di julio 2021) Olympics’ First Openly Transgender Woman Stokes Debate on Fairness (Angla). The New York Times. URL vidita ye la 2ma di agosto 2021.
  13. (31ma di julio 2021) Canadian women’s football team player Quinn becomes first trans athlete in Olympics (Angla). Op India. URL vidita ye la 4ma di julio 2021.
  14. (2ma di agosto 2021) Polónia dá visto humanitário a atleta que recusou regressar à Bielorrússia (Portugalana). Público.
  15. (24ma di julio 2021) China conquista o primeiro ouro da Olimpíada de Tóquio (Portugalana). Agência Brasil. URL vidita ye la 25ma di julio 2021.
  16. 16,0 16,1 16,2 16,3 16,4 (25ma di julio 2021) Roundup of Olympic gold medals from Sunday, July 25 (Angla). AP News.
  17. Ana Maria Popescu, medalie de argint la spadă - Înfrângere dramatică la tușă de aur (10-11 cu Yiwen Sun) (Rumana). HotNews.ro.
  18. (25ma di julio 2021) Olympic Medalists Can Now Take a Quick Maskless Podium Photo After IOC Reverses Course (Angla). Sports Washington.
  19. (24ma di julio 2021) South Korea wins gold in archery's mixed team Olympic debut (Angla). ABC News. URL vidita ye la 2ma di agosto 2021.
  20. (24ma di julio 2021) Weightlifting-China's Hou wins 49-kg weightlifting gold (Angla). Reuters.
  21. (26ma di julio 2021) Taekwondo-Jordan's silver medallist happy for Russian friend's gold (Angla). REUTERS.
  22. (25ma di julio 2021) Thailand’s Panipak Wongpattanakit Wins Gold at Tokyo Olympics (Angla). Chiang Rai Times.
  23. (25ma di julio 2021) Prazer, Olimpíadas! Skate estreia com primeira medalha para o Brasil (Portugalana). CNN Brasil.
  24. Steen, Emma (26ma di julio 2021). 13-year-old Momiji Nishiya wins gold, becomes Japan’s youngest Olympic medalist. timeout.com. URL vidita ye la 26ma di julio 2021.
  25. (26ma di julio 2021) O QUE VOCÊ FAZIA AOS 13? (Portugalana). UOL.
  26. (31ma di julio 2021) Belinda Bencic wins women's singles gold; Elina Svitolina claims bronze (Angla). NBC. URL vidita ye la 3ma di agosto 2021.
  27. Bredow-Werndls Goldritt auf Dalera (Germana). URL vidita ye la 31ma di julio 2021.
  28. Resultados de Natación - Masculino (Hispana). URL vidita ye la 2ma di agosto 2021.
  29. (25ma di julio 2021) Quem é o tunisiano que largou da raia 8 para ser campeão olímpico em Tóquio (Portugalana). UOL.
  30. (26ma di julio 2021) Australia's Ariarne Titmus Beats Katie Ledecky to Win Gold in 400m Freestyle. Sports Illustrated.
  31. (26ma di julio 2021) Fernando Scheffer surpreende e leva o bronze nos 200m livre nas Olimpíadas. UOL.
  32. Bruno Fratus confirma favoritismo e leva o bronze nos 50m livre (Portugalana). UOL. URL vidita ye la 31ma di julio 2021.
  33. (3ma di agosto 2021) Ana Marcela dispara no fim e ganha a medalha de ouro na maratona aquática. UOL.
  34. 34,0 34,1 (27ma di julio 2021) 2020 Tokyo Olympics women's gymnastics: U.S., without Simone Biles, takes silver, ROC wins gold in team final. CBS.
  35. (26ma di julio 2021) Russian men win rare Olympic artistic gymnastics team gold (Angla). France 24. URL vidita ye la 3ma di agosto 2021.
  36. Guan Chenchen wins balance beam gold at the Tokyo Olympics as Simone Biles claims bronze. CNN.
  37. Rebeca Andrade: ouro no salto a torna 1ª brasileira com duas medalhas (Portugalana). UOL. URL vidita ye la 1ma di agosto 2021.
  38. (1ma di agosto 2021) Rebeca Andrade wins the vault, Brazil’s first gold in women’s gymnastics. (Angla). The New York Times.
  39. (26ma di julio 2021) Olympic triathlon: Duffy wins first gold for Bermuda as Britain’s Taylor-Brown gets silver. The Guardian.
  40. (31ma di julio 2021) Thompson vence e bate recorde olímpico nos 100m rasos; Jamaica domina pódio (Portugalana). UOL.
  41. (1ma di agosto 2021) Jacobs surpreende, vence os 100m rasos e dá 2º ouro à Itália no atletismo (Portugalana). UOL.
  42. (2ma di agosto 2021) Tokyo Olympics 2020: Jasmine Camacho-Quinn’s first ever athletics gold for Puerto Rico sparks wild celebrations (Angla). The Independent.
  43. (2ma di agosto 2021) Jasmine Camacho-Quinn becomes second Puerto Rican to ever win gold (Angla). Yahoo.
  44. (2ma di agosto 2021) Sifan Hassan dominates to win 5,000m at Tokyo Olympics in bid to claim historic gold medal treble. Independent.
  45. (30ma di julio 2021) Selemon Barega wins 10,000m gold at the Tokyo Olympics despite Uganda's tactical approach (Angla). CNN.
  46. (30ma di julio 2021) What is the new athletics mixed relay event? (Angla). Olympics.com. URL vidita ye la 1ma di agosto 2021.
  47. (31ma di julio 2021) Athletics-Stahl adds gold to world title in Swedish one-two (Angla). Reuters.
  48. Athletics Women - Women's Triple Jump (Angla). NHK. URL vidita ye la 1ma di agosto 2021.
  49. (7ma di agosto 2021) Tokyo Olympics: Kenya's Peres Jepchirchir wins women's marathon. BBC.
  50. (7ma di agosto 2021) Kipchoge domina, vence maratona e conquista bicampeonato olímpico (Portugalana). UOL.
  51. (8ma di agosto 2021) Jeux Olympiques : Volleyball Hommes (Franca). La Voix du Nord.
  52. (8ma di agosto 2021) Brasil sofre revés para os EUA e fica com a prata no vôlei feminino. Olimpíada Todo Dia.
  53. 53,0 53,1 (7ma di agosto 2021) Noruega vence a Rússia e garante ouro no vôlei de praia masculino (Portugalana). UOL.
  54. (6ma di agosto 2021) Cameras capture Aussie legend’s tears after Olympic heartbreak. News.Com.Au.
  55. (6ma di agosto 2021) Algoz do Brasil, dupla suíça fica com o bronze no vôlei de praia feminino. UOL.
  56. (31ma di julio 2021) Kelsey Plum: American Ace defies Achilles’ injury to achieve gold at Tokyo 2020. Olympics.com. URL vidita ye la 7ma di agosto 2021.
  57. (8ma di agosto 2021) Estados Unidos vence o Japão e conquista o ouro no basquete feminino (Portugalana). GZH.
  58. (7ma di agosto 2021) Ouro consolida o Brasil como maior potência olímpica do futebol e pode render frutos na Copa do Mundo (Portugalana). UOL.
  59. (6ma di agosto 2021) México vence Japão e fica com o bronze olímpico no torneio masculino de futebol (Portugalana). Ge.Globo.com.
  60. (6ma di agosto 2021) Canadá vence a Suécia nos pênaltis e conquista o ouro no futebol feminino. Ge.Globo.com.
  61. (5ma di agosto 2021) Os gols de Austrália 3 x 4 Estados Unidos pelo bronze no futebol feminino nas Olimpíadas de Tóquio (Portugalana). Ge.Globo.com.
  62. Quadro de Medalhas - Olimpíadas 2020 (Portugalana). UOL. URL vidita ye la 9ma di agosto 2021.